Nüfuzlu "EMEA Finance Europe" beynəlxalq maliyyə jurnalı "Banking Awards 2012"nin sahiblərinin siyahısını açıqladı. Səsvermənin nəticələrinə görə, "Azərbaycanın ən yaxşı İnvestisiya Bankı" nominasiyasında PAŞA Bank artıq ikinci dəfədir ki, ardıcıl olaraq, qalib seçildi.
Bankın İdarə Heyətinin üzvü, İnvestisiyalar üzrə Baş Direktor (CIO) Taleh Kazımovun sözlərinə görə, PAŞA Bankın investisiya istiqamətində fəaliyyətinin nəticələri peşəkar ictimaiyyət tərəfindən yenə də yüksək qiymətləndirilmiş və bu səbəbdən Bank, ardıcıl olaraq ikinci dəfə bu mükafata layiq görülmüşdür. T.Kazımov qeyd etmişdir ki: "2 ildən bir qədər artıq müddət ərzində PAŞA Bank tərəfindən 9 buraxılışla ümumi məbləği 97,8 mln. AZN-ə bərabər 6 emitentin korporativ istiqraz vərəqələri buraxmışdır (müxtəlif sahələrin nümayəndələri, o cümlədən bank, lizinq və telekommunikasiya sektorları daxil olmaqla). PAŞA Bank anderrayter olduğu bütün böyük buraxılışlar üzrə təkrar bazarda marketmeyker xidmətləri göstərir. Xatırladım ki, 2012-ci ildə PAŞA Bank Azərbaycan İpoteka Fondunun ipoteka istiqrazları üzrə marketmeyker xidmətlərini göstərməyə başlamışdır. Bazarda yüksək likvidliyi nəzərə alaraq, təkrar bazarda 7-illik ipoteka kağızlarının gəlirliliyi 3 %-dən 2,962 %-dək enmişdir (emissiyanın həcmi - 55 mln. AZN). 2012-ci ilin sonuna yerli qiymətli kağızlar portfeli 300 mln. AZN (382 mln.ABŞ dollarından çox) təşkil etmişdir ki, bu, yerli bazarda qiymətli kağızların 50 %-dən çoxunu təşkil edir. İlin yekunlarına görə qiymətli kağızların ümumi portfeli 335 mln. AZN-dən (427 mln. ABŞ dollarından çox) yuxarı olmuşdur - ötən illə müqayisədə artım 23,7% təşkil etmişdir".
PAŞA Bank öz müştərilərinə korporativ istiqraz vərəqələri üzrə put-opsionların satışı xidmətlərini göstərməyə başlamışdır (2012-ci il ərzində ümumi məbləği 3 mln. AZN olmaqla 2 opsion satılmışdır).
Bütün il ərzində PAŞA Bank bir çox layihələri həyata keçirməyə müvəffəq olmuşdur. Bu layihələrin sırasında PAŞA Bankın Azərbaycanın özəl bankları arasında, ilk dəfə olaraq, avrobondların iri həcmli buraxılışında ko-menecer rolunda iştirak etməsi xüsusi yer tutur (Baghlan Group, 150 mln. ABŞ dolları).
İlin ikinci yarısında Bank dünyanın aparıcı reytinq agentlikləri tərəfindən 2 beynəlxalq reytinqə layiq görülmüşdür. Belə ki, Fitch Ratings PAŞA Banka "B+" səviyyəsində emitent defoltunun uzunmüddətli reytinqini ("sabit" proqnoz), Standard & Poor's - uzunmüddətli "BB-" və qısamüddətli "B" reytinqini (reytinqin dəyişməsinin "sabit" proqnozu) vermişdir. S&P-nin verdiyi reytinq ölkənin 100% yerli kapitala malik özəl bankları arasında ən yüksək, Azərbaycanın bütün özəl bankları arasında isə, ikinci ən yaxşı reytinqdir.
Qeyd edək ki, "Europe Banking Awards"ın qalibləri səsvermənin nəticələrinə görə müəyyən edilir. Səsvermədə maliyyə sektoru üzrə dünyanın aparıcı ekspert-analitikləri və bank konsultantları iştirak edir. İnkişafda olan ölkələrin bazarlarının bank sektorunun təhlili zamanı aktivlərin artımı, mənfəətlilik, strateji əlaqələrin inkişafı, müştərilərə xidmət sahəsi, rəqabət qabiliyyətliliyi, innovasiya məhsulları xətti və s. kimi meyarlar nəzərə alınır.
"Europe Banking Awards 2012"nin mükafatlandırma mərasimi iyunun 5-də Avstriyada baş tutacaq.